عزيزتي الأمورة ...2
الضمان والهيمنة والسيطرة...!!!
مرحبا بك مجدداً ...قلنا في المرة السابقة أن أرضيتنا المشتركة هي :
القاعدة الذهبية " ظل رجل ولا ظل حائط" ...
وشعارنا هو " هييجي اليوم "...
وفي هذه المره نضيف أهدافنا الرئيسية ، التي لخصها صلاح جاهين في مقدمة مسلسل هو وهي :
" اربطيه جنبك يا هبلة بالعيال ....
ليا يا اختي ...
لجل الضمان والهيمنة والسيطرة ... "
هكذا بكل بساطه لخص أهدافنا ... الضمان والهيمنة والسيطرة
طبعا ديه مش أهداف منظمة عاوزه تسيطر علي العالم ، ولا هتكتشفوا في الاخر ان المقالات ديه بتكتبها سونيا جراهام
وخلينا نرغي ونوضح معني الكلام :
الضمان ... أن تجدي في كل المناسبات مبلغ مناسب في المحفظه لشراء حذاء جديد أو ثوب تحفة قبل أن يسبقك اليه احد ، ورصيد مناسب في البنك لمواجهة تحديات الأوكازيونات والفسح وهدايا عيد ميلاد وطلبات السلف من الأقارب والصديقات
الهيمنة ... أن تكون الكلمة كلمتك والشوري شورتك ... هذا فيما يتعلق بالسياسة العامة ، يعني الخطوط العريضة ، يعني ايه ممكن يتعمل وايه مينفعش يتعمل
السيطرة... ان تكون الكلمة كلمتك والشوري شورتك...فيما يتعلق بالتفاصيل الدقيقة والخطط التنفيذية ، يعني في كل صغيرة وصغيرة.
عشان اللخبطه نوضح الاتنين الاخرانيين بمثال :
يعني لو مثلا عريس الغفلة عاوز يخلي مصروف البيت معاه
ده يبقي بيهدد الهيمنة ...
بس لو جه مثلا وخبا منك علاوة...
يبقي بيهدد السيطرة .
الثلاثة دول مع بعض يخلوكي أمورة إلي حد كبير ؟
قوليلي ازاي ؟
يعني من اليوم الاول ، يعني الخطوبة او ما قبلها - لو كان فيه ما قبلها- لازم تاخدي موقف واضح مفيهوش تفاهم عشان تضمني الحاجات الثلاثة دول ...
وعشان تحقيقهم كل شئ مباح ...
وطبعا مفيش اشطر من الستات في استخدام كل الاساليب ...!!!
بس انا من ناحيتي هاقول شوية اقتراحات ، وكل واحده تاخذ اللي يناسبها اكثر ، وممكن تبدع فيه ، وممكن ينفع مع الزوج .
وطبعا كلكم عارفين المثل الشهير " اللي مربي قرد عارف لعبه" ...!!!
وماحدش يقولي ده احنا لسه بنتعرف والكلام ده ، عشان الست متبقاش ست لو ما عرفتش اخر الرجل اللي هترتبط بيه من اولها وباسرع ما يمكن ، تقولولي فيه رجاله سهتانيين ومابيبانش عليهم ، اقولكم ولو ...
الرجل مهما كان ممكن يظهر علي حقيقته بسرعه ، وبطرق كثيره ، اسهلها ..اتفقي معاه علي حاجه وبعدها بنص ساعة اعملي عكسها وشوفي رد فعله ...
قالك اتفقنا ... قوليله انا مقلتش كده ،
قالك ده مكانتش نص ساعة ... قوليله انت عندك اوهام وتخيلات – زي بتاعت حسن يوسف كده – وعاوز حد يفوقك – بالقلة المليانه برضه –
قالك انت جباره وبتغيري كلامك علي مزاجك ... قوليله انت اللي عمال تعمل علي فيلم عشان اصدقك.
رد فعله بقي هيكون طبيعي جدا وهايبان بيعرف يتحكم في اعصابه ولا لا ، اللي مخبيه هيبان ، وهكذا...
خلاص دلوقتي فهمتي طبيعة الباشا ؟
هنا بقي تبدئي تشوفي انت لازم تكوني معاه ازاي
يعني ايه ؟
يعني افرضي انت هادية ومستكينة مع اهلك وصحابك ، بس لو عاوزه تبقي اموره لازم معاه تبقي العكس ...
خصوصا لو كان هو هادئ
يعني بالذات لو هو هادئ يبقي انت لازم تكوني عصبية ومتنرفزة ..
واي حاجه يناقشك فيها تقلبيها خناقة ...
عشان يتعلم يختصر الطريق وما يناقش اصلا
ولو كان هو عصبي فانت تعملي مجنونة !!!
اتعصبي اكثر منه وممكن تصرخي فيه !!!
ولو حسيتي ان الأمر هيخرج من ايدك تدخلي في مرحلة العياط اللي يقطع القلب ، واقطعي المناقشة ، وادخلي اوضة النوم واقفلي علي نفسك بالمفتاح وسيبيه بره
ديه بس أمثلة للتوضيح وفي المقالات الجاية هنتكلم بالتفاصيل ، بس ما تنسوش شعارنا .." هييجي اليوم ...!!!" ...وإلي مقال جديد
